Hee-j ésse dan:

Ich, Sjors Smeets bin nao de wichter boontemiddig op 11 januari 2026 uutgeroôpe as jeugdpreens van CV de Heiknuiters uut Altwieërthej, ontzettendj gruuëts bin ich dao op!

Ich bin 13 jaor en gaon nao schoeël op ‘t Kwadrant in Wieërt. Al mien slûmmigheid hebbe ze mich beej gebrachtj op oeës schoeën basisschoeël Kindcentrum Altwieërthej.

Ich woeën op Eigen erf met mien aojers Willie, Wendy en mien broôr Quinn. De meîste minse kinne hem auch wûl, hae waas adjudânt in 2022 van prinses Puck.

In het weekend bezörg ich altiêd de reclamefolders.

Dit doon ich gaer want ich kom völ minse tieëge en vîng ut gezellig um te kalle met edereîn.  De dörpsbewoeëners zörge altiêd hiel good vör mich want tiêdes mien ronde kriêg ich vaak iets lekkers of cênte tôwgestoptj.

In ut fieëstpaviljoen beej de sporthal waere völ activiteite georganisieërdj woeë ich uch gaer uûtnoeëdig um saame met mich vastelaovundj te vieëre.

Beej de schoeëloptocht, de wichter hosmiddig enne optocht op vastelaovundj maondjig zeen ich uch gaer.

En, um neet te vergaete oeës Pubquiz!

Mien devies és: “met deze lachendje heiknuiter veurop waerdj de vastelaovundj hieëlemaol top”

Altwieërthej Alaaf!